Tensy anders uit die konteks blyk, sluit die woorde in hierdie dokument wat manlik aandui ook vroulik in en omgekeerd. Woorde in die enkelvoud sluit ook die meervoud in, en omgekeerd.

1: Skoolkarakter

Laerskool Handhaaf ondersteun ’n waardegedrewe onderrigsisteem. Beginsels soos betroubaarheid, respek, verantwoordelikheid, regverdigheid, omgee en goeie burgerskap vorm die pilare van hierdie sisteem. Ons poog om leerders in alle fasette van die waardesisteem leiding te gee.

Bywoning en respektering van alle saalbyeenkomste is verpligtend, met erkenning van leerders en personeel se religieuse voorkeur.

2: Taalmedium

Die onderwysinrigting se voertaal is Afrikaans. Engels word slegs as ’n leerarea aangebied.

3: Kulturele skoolkarakter

Alle opvoeding en onderrig vind deurlopend plaas met die skoolkultuur en -tradisie as uitgangspunt.

4: Akademiese standaarde

Die skool streef daarna om deurlopend ’n hoë akademiese standaard te handhaaf. Dit word van ouers, onderwysers en leerders verwag om nou saam te werk om dit te bereik.
’n Leerder sal in die toepaslike graad geplaas word op grond van sy/haar akademiese posisie en ouderdom, soos voorgeskryf deur die SA Skolewet:

• Graad RR - 5 jaar
  
• Graad R - 6 jaar
  
• Graad 1 - 7 jaar
  
• Graad 2 - 8 jaar
  
• Graad 3 - 9 jaar
  
• Graad 4 - 10 jaar
  
• Graad 5 - 11 jaar
  
• Graad 6 - 12 jaar
  
• Graad 7 - 13 jaar
  

5: Aansoek Om toelating

Die volgende dokumentasie word vereis:

• ’n Voltooide toelatingsvorm.
  
• ’n Amptelike oordragvorm van die vorige skool (indien van toepassing).
  
• ’n Afskrif van die mees onlangse skoolrapport.
  
• ’n Gesertifiseerde afskrif van die leerder se geboortesertifikaat.
  
• ’n Gesertifiseerde afskrif van die volledige immunisasiesertifikaat.
  
• Dokumente wat enige spesifieke leerbehoeftes aandui.
  
• Indien van toepassing: ’n verslag van ’n kliniese sielkundige indien die kind reeds skoolpligtig is, maar nog nie skoolgereed is nie.
  
• Toestemmingsvorm vir gebruik van persoonlike inligting (POPIA).
  
• Vrywaringsvorm met betrekking tot foto’s, beeldmateriaal en video’s.
  
• Getekende verklaring.
  

6: Skooltrots

Hierdie aspek geniet ’n baie hoë prioriteit. Van opvoeders, ouers en leerders word verwag om trots te wees op Laerskool Handhaaf en om die naam en beeld van die skool positief uit te dra.

Geen leerder mag die naam van die skool in diskrediet of ongunstige lig bring nie.

7: Skooldissipline

Dissipline geniet hoë prioriteit. Leerders moet hulle onderwerp aan die gesag van die skoolhoof, personeel en die goedgekeurde reëls van Laerskool Handhaaf (sien gedragskode).

Let op:

Morele waardes moet deur opvoeders en leerders te alle tye gehandhaaf word. Geen vorm van seksuele toenadering, intimiteit, uitlokking of misbruik word aanvaar nie.

8: Onderlinge verhoudinge

Goeie verhoudinge tussen opvoeders, ouers en leerders is noodsaaklik. Wedersydse respek vir die professionaliteit van die personeel en die verantwoordelikheid van ouers teenoor die skool en hul kinders, word verwag.

9: Skoolreëls en Skooldrag

Van alle leerders word verwag om:

• Alle skoolreëls te gehoorsaam.
  
• Die amptelike skooldrag (winter en somer, graad 1–7) met trots te dra.
  
• Die skool stiptelik en gereeld by te woon.
  
• Te sorg dat hul voorkoms en klere voldoen aan die gedragskode soos deur die Beheerliggaam vasgestel.
  

10: Nasionale simbole

Leerders moet respek toon teenoor die nasionale simbole van die RSA, asook die skool se waardes en simbole.

11: Onderriggeld

’n Gesonde finansiële beleid is noodsaaklik vir die skool se funksionering. Die Beheerliggaam hou toesig oor verantwoordelike besteding van fondse.

Ouer/voog kan kies om onderriggeld maandeliks, kwartaalliks, halfjaarliks of jaarliks vooruit te betaal.

12: Sport- en kultuurprogram

Die skool plaas ’n hoë prioriteit op leerders se deelname aan sport en kultuur. Vanaf Graad 3 is deelname verpligtend.

Graad R tot 2-leerders word aangemoedig om deel te neem om vaardighede op te bou wat hul voorbereiding ondersteun vir latere verpligte deelname.

13: Verklaring

Deur die verklaring wat by die toelatingsvorm aangeheg is te onderteken, bevestig die ouer/voog dat hy/sy die toelatingsverklaring en -beleid verstaan en aanvaar. Weiering om te onderteken beteken nie dat die leerder nie daaraan onderhewig is nie.

Enige versoek tot wysiging moet skriftelik gerig word aan die Beheerliggaam vir oorweging en goedkeuring. Indien die Onderwysdepartement en/of Beheerliggaam bevind dat ouer/voog of leerder nie by die bepalings hou nie, sal toepaslike optrede volg.

Die Beheerliggaam vertrou dat u, as ouer/voog van ’n leerder aan Laerskool Handhaaf, hierdie verklaring sal nakom en respekteer vir die duur van u kind se inskrywing.

Ons waardeer u lojale samewerking tot voordeel van ons skool en al sy leerders.